開始AK IN KK的原因

開始AK IN KK的原因

關於AK IN KK果頁,我無乜講個Project既由來,呢篇就講下啦!主要原因有3個⋯⋯

黑歷史

AK IN KK第一次出現係2016年,果陣係一個演藝學院既功課Project,要做一D想做既野。

果陣無諗咁遠,去完越後妻有大地藝術節,想逼自己行多D山,投入下大自然。所以買左部錄音機,錄下山上既聲音,搞左一個Facebook Page,無聲音地圖聲音存庫,成件事好簡漏。用既係Google Drive 同Sound Cloud。

2016年錄左11次,果陣未買三腳架,都係手揸住錄(隻手好凍),好多都會有我既呼吸聲錄埋(D呼吸聲cut得到我而家cut返)。果陣既錄音係主題:早期錄音入面。

2017年放低左件事,無錄音,係免費平台整左個網頁,主要係放個人Portfolio,順便做堆個Project網。買左個Domain,都係akinkk.com,但都係好簡漏。

真歷史

直到2018年9月,颱風山竹襲港,其破壞程度唔洗多講,半個9月漁護署叫人唔好行山住。加上果排我好頹,剩係返工無乜做過自己可以有份諗既Project,就起左重做AK IN KK既念頭。

原因1:香港較少自然聲音記錄。

圖片就大把,聲音則少之有少,上網搵點都有少少,但真係好少,或者無一個界面放埋一齊。自己覺得聲音記錄緊既係活生生既生態,同埋人既時代文化,睇到幾個大型既聲音地圖,例如:nature sound map 或者 radio aporee都想自己整返個。

原因2:怕大自然一下子的消失,記錄唔切。

其實好簡單,天災人禍都好,打個風,山個火,幾架泥頭車倒曬D泥,發個展,乜都無曬嚕。既然預計唔到,未早D慢慢一個一個去記錄。

原因3:想用返本地既聲音素材

之前成日都用緊亞馬遜雨林既環境聲,係好正呀不過感覺好遠,想試下用返香港既,可能會親切D?其實都係一個假設尼,一路做一路搵緊呢個答案。當然未必下下都岩用到,做泰山用返非州既聲都好正常,但做左出尼起碼有香港既Option。

 

關於收費

其實我心入面係好想D聲音比人用得到,好過擺係到。但一路做一路發覺成本比預期高好多,無得開善堂,所以用錄音長度尼分左價錢,更何況總唔可以將聽得既當免費午餐既。三分鐘內免費比人聽同用,有人覺得已經好多,都唔洗再去買,但一分鐘真係聽唔到D咩,一架飛機都未飛過完,大約3分鐘陪到你淥到個杯麵食啦。3分鐘應該無2架飛機飛過既。

發表迴響