係關於AK IN KK果頁，我無乜講個Project既由來，呢篇就講下啦！主要原因有3個⋯⋯ 黑歷史 AK IN KK第一次出現係2016年，果陣係一個演藝學院既功課Project，要做一D想做既野。 果陣無諗咁遠，去完越後妻有大地藝術節，想逼自己行多D山，投入下大自然。所以買左部錄音機，錄下山上既聲音，搞左一個Facebook Page，無聲音地圖同聲音存庫，成件事好簡漏。用既係Google Drive 同Sound Cloud。 2016年錄左11次，果陣未買三腳架，都係手揸住錄（隻手好凍），好多都會有我既呼吸聲錄埋（D呼吸聲cut得到我而家cut返）。果陣既錄音係主題：早期錄音入面。 2017年放低左件事，無錄音，係免費平台整左個網頁，主要係放個人Portfolio，順便做堆個Project網。買左個Domain，都係akinkk.com，但都係好簡漏。 真歷史 直到2018年9月，颱風山竹襲港，其破壞程度唔洗多講，半個9月漁護署叫人唔好行山住。加上果排我好頹，剩係返工無乜做過自己可以有份諗既Project，就起左重做AK IN KK既念頭。 原因1：香港較少自然聲音記錄。 圖片就大把，聲音則少之有少，上網搵點都有少少，但真係好少，或者無一個界面放埋一齊。自己覺得聲音記錄緊既係活生生既生態，同埋人既時代文化，睇到幾個大型既聲音地圖，例如：nature...

今日我講一講IN同SB，兩種係AK IN KK既檔案分類用到既編碼。 簡單尼講，IN同SB都係一D錄音，都係係山上錄音既成果，但係點解要分兩個名呢？ 由於錄音既地理位置係重點，為正常我去錄音前會決定一個目的地。行上山，停低，錄音，返落山。我盡量唔會一日錄好多個地方，一來留力，二來希望保留更多唔同日子天氣既分野。呢D有目的地既錄音係叫IN，例如2019年1月2日錄既IN0034。 有時都有例外既，行行下去到一個位覺聽到個聲景覺得正呀唔錄唔得，時間又許可的話，我都會停低錄既，果D就會係SB (Stop-By) 順道錄音。可以話SB既欣賞性會高D，例如2019年1月2日SB0001。 暫時上載左既SB只有一個，不過仲有更多陸續有來，一星期一個左右啦！

AK IN KK 3月12日正式開幕喇！

埋頭苦幹左六個月，都唔記打一路既工作進度，都唔記得一路做一路Cap住 D圖，所以花絮類既野好少，接近無⋯⋯ 唔計2016年好頹咁錄左幾次音，〔（早期錄音）果D〕，開左個無乜update既page，2017年整左個好簡單既website，AK IN KK重製諗法係係2018年九月開始萌牙。 九月嘅時候，山竹襲港，做成好大破壞，又明日大嶼，我係到諗，要襯咁靚嘅自然環境消失之前，可以係人為可以係天災，好好記錄一下，要徹徹底底咁做。聲音地圖同聲音存庫存在係腦海入面係好耐嘅諗法，但一直都冇能力去實行，既然畢咗業成年，好似冇乜學過野，冇乜做過啲咩，咁就不如自己實實在在去做呢件事啦。 錄音就係十月開始錄，買個三腳架帶返部Tascam DR-44 WL，重新出發。其實做呢件之前成年幾乎無乜行過山，掛住做野，又無乜動力。Freelance嘅好處就係可以平日上山，試咗幾次星期日，發覺真係好多人，對於錄音來講好唔方便，所以之後我都盡量平日上山。 除咗錄音攞素材，都有一直去研究點樣整呢個網，始終呢個唔係我熟悉嘅範疇，都花咗好多時間去處理。記得我Send Email問過Nature Sound Map嘅網主，亦都好彩佢分享左俾我聽佢用咩去做個網頁。至於聲音存庫，我好想做到好似Free Sound咁。於是我由以前平啲但係好得限制嘅平台，轉到而家呢一個相對地自由道大好多嘅平台，當然課金係少不免。撞左好多次版之後，就變成而家你地睇到嘅呢個版面，亦係我心目中想做到嘅聲音地圖同聲音存庫。 為左個網洗費變大，要靠返工去支持，所以諗到用港島徑去做主題，因為我住港島，等我平日可以日頭上山夜晚返工，放假先去遠啲。最後而家好似一半都係港島徑。。。 聽雀仔聲去辨別品種更加唔使講咁難，呢個真係考起我，用好多時間都未必一定啱。 其實一個人可以走到呢一步，已經超出我預期。當然唔係成日都一個人，要多謝阿葉幫手設計嘅Logo，多謝一班陪我上山嘅朋友，多謝搞到少咗好多拍拖時間都無怨言嘅女朋友。 我都唔知講咩好，我唔知我可以任性幾耐，唔知呢個計劃可以做到幾遠，盡力去填滿張地圖啦。